Forstjóri Korean Air rekur dætur sínar vegna misbeitingar valds

Forstjóri suður kóreska flugfélagsins Korean Air hefur gefið út að dætur hans tvær muni hætta störfum hjá flugfélaginu vegna tveggja aðskildra atvika þar sem þær eru sagðar hafa misnotað stöðu sína innan fyrirtækisins.

Lögreglan er með yngstu dóttur forstjórans, Cho Hyun-min, til rannsóknar vegna ásakana um að hafa skvett vatni á samstarfsfélaga sinn.

Eldri systir hennar er þekkt fyrir að hafa tafið brottför flugs árið 2014 vegna hnetupoka. Var hún fangelsuð vegna málsins.

Faðirinn, Cho Yang-ho, hefur sent frá yfirlýsingu þar sem hann biður kóresku þjóðina og starfsmenn sína afsökunar á framferði dætra sinna.

Hann sagði dætur sínar verða sviptar allri ábyrgð innan flugfélagsins.

Fréttastofa breska ríkisútvarpsins BBC segir bæði mál dætranna hafa ratað í sviðsljós fjölmiðla í Kóreu og vakið upp umræðu um kóreskan-vinnumarkað. Þar ráða ríkjum fjölskyldufyrirtæki sem eru kölluð chaebols í Suður Kóreu.

Cho Hyun-min, sem er einnig þekkt undir nafninu Emily, var varaforstjóri flugfélagsins, en hún er sögð hafa misst stjórn á skapi sínu því henni mislíkaði svar sem hún fékk á fundi. Hún neitaði að hafa skvett vatni en viðurkenndi að hafa ýtt auglýsingastjóranum.

Fjöldi steig fram og krafðist þess að henni yrði vikið frá störfum.

Flugfélagið var nú þegar undir miklum þrýstingi vegna elstu dóttur forstjórans, Cho Hyun-ah, sem varð bálreið þegar henni voru færðar makademíuhnetur í poka en ekki á disk í flugi New York til Seoul í Suður Kóreu fyrir fjórum árum.

Hún var fundin sek um að hafa ógnað flugöryggi og fyrir að misnota vald sitt og var dæmd til fimm mánaða fangelsisvistar.

Systurnar eru barnabörn stofnanda Hanjin Group, sem er eitt af stærstu viðskiptaveldum Suður Kóreu.

Bróðir þeirra, Cho Won-tae, er einn af æðstu stjórnendum Korean Air.

BBC segir lögreglu hafa leitað á skrifstofum og heimilum systkinanna síðastliðinn fimmtudag vegna ásakana um að þau hefðu komist hjá því að greiða gjöld af lúxusvarningi.