Fjórði hver ferðamaður frá Kína

Fyrir árið 2030 verða utanlandsferðir Kínverja 400 milljónir samkvæmt spá kínversks rannsóknaseturs í ferðamálum. Það þýðir að nær fjórði hver ferðamaður sem ferðast um heiminn mun koma frá Kína.

Á undanförnum þremur árum hefur Kínverjum sem fengið hafa vegabréf fjölgað um eitt prósent á ári eða um 14 milljónir en fjöldi íbúa í Kína er nær 1,4 milljarðar. Nú hafa eingöngu níu prósent þeirra vegabréf og þeir fara í 154 milljónir utanlandsferða á ári.

Yfir helmingur Kínverja fer nú í utanlandsferðir á eigin vegum. Oft er um að ræða unga Kínverja og vel stæða, samkvæmt rannsóknum sem norski miðillinn Dagsavisen greinir frá. Norskir markaðsfræðingar ræða nú mögulegan ferðamannastraum frá Kína til Noregs.