Vara við skolpi í sjó í Kópavogi

Kópavogsbær varar við því að næstu nótt verður fráveita við Hafnarbraut 20 á yfirfalli vegna viðhalds á spennistöð Veitna ohf. á Kársnesbraut. Rafmagn verði tekið af dælustöð fráveitunnar milli klukkan fjögur og sjö.

„Á meðan á rafmagnsleysi stendur verður dælustöð fráveitu á yfirfalli og mun skolpi verða veitt í sjó framan við dælustöðina. Almenningi er bent á að gæta varúðar við sjó í næsta nágrenni við dælustöðina meðan á straumleysi stendur,“ segir í tilkynningu frá bænum. Heilbrigðiseftirlitið muni fylgjast með mengun í sjó í kringum dælustöðina.