Erlent

Brotnaði niður í beinni vegna frétta um aðskilnað ungabarna frá foreldrum sínum

Hulda Hólmkelsdóttir skrifar
Maddow baðst síðar afsökunar á því að tilfinningarnar hefðu borði hana ofurliði.
Maddow baðst síðar afsökunar á því að tilfinningarnar hefðu borði hana ofurliði. Skjáskot
Fréttir af aðskilnaði barna og foreldra á landamærum Bandaríkjanna og Mexíkó hafa vakið mikinn óhug og hreyft við mörgum síðustu daga. Ein þeirra er sjónvarps- og fréttakonan Rachel Maddow, sem brotnaði niður í beinni útsendingu í gærkvöldi þegar hún reyndi að lesa nýja frétt af málinu.

Maddow stýrir The Rachel Maddow Show á MSNBC og í miðri útsendingu fékk hún nýja frétt frá AP fréttastofunni. Þar sagði að ungabörn og önnur ung börn væru aðskilin frá foreldrum sínum í Texas og að þeim væri haldið í þremur skýlum sem væru sérstaklega ætluð börnum á viðkvæmum aldri.

Fréttin reyndist Maddow, sem hefur starfað í fjölmiðlum frá árinu 1999, ofviða. Eftir nokkrar misheppnaðar tilraunir hætti hún að reyna að lesa fréttina, kvaddi áhorfendur og sendi boltann yfir til annars fréttamanns.

Maddow baðst síðar afsökunar á atvikinu á Twitter síðu sinni. Hún sagðist hafa „misst það í smá stund“ og að það væri hennar starf að geta í það minnsta talað þegar hún væri í sjónvarpi. Þar rakti hún fréttina sem hún gat ekki lesið fyrr um kvöldið.

Í henni segir heilbrigðisstarfsmenn og aðrir sem hafi heimsótt flóttamannabúðirnar í Rio Grande dalnum hafi lýst leikherbergjum fullum af grátandi börnum á leikskólaaldri. Til standi að opna fjórðu búðirnar undir hundruð ungra barna í Houston, en yfirvöld í borginni hafa hafnað þeim áformum. 

Meira en tvö þúsund börn hafa verið tekin frá foreldrum sínum síðan stjórnvöld í Bandaríkjunum tilkynntu um herta innflytjendastefnu í maí. Stefnan hefur vakið mikla reiði um allan heim. Fréttastofur í Bandaríkjunum hafa meðal annars komist yfir upptökur af grátandi börnum sem eru í haldi bandarískra yfirvalda í flóttamannabúðunum, sem öskra á foreldra sína af veikum mætti.

Mörgum þykir Maddow hafa með þessu lýst afstöðu þjóðarinnar til flóttamannabúðanna, en rúmlega 60 prósent Bandaríkjamanna eru mótfallnir aðgerðunum.

Aðskilnaður barna og foreldra í Bandaríkjunum

Tengdar fréttir

Funda vegna stefnu Trumps

Óhuggulegt er að börn séu notuð sem skiptimynt í deilum um landamæravegg forsetans segja nefndarmenn í utanríkismálanefnd. Ráðherra segir afstöðu Íslands vera skýra og henni verði komið á framfæri.

Mest lesið


Fleiri fréttir

Sjá meira


×

Mest lesið