Fimmti drengurinn kominn út

Fjölmargir heimildarmenn erlendra miðla, sem nú sitja um hellinn þar sem hópur fótboltadrengja situr fastur, segja að búið sé að bjarga fimmta drengnum úr prísundinni. Björgunaraðgerðin tók um 6 klukkustundir og var drengurinn fluttur með sjúkrabifreið af vettvangi.

Fjórum fótboltapiltum var bjargað úr hellinum í gær. Þeir dvelja nú á sjúkrahúsi og eru sagðir við góða heilsu. Þeir eru þó enn í einangrun því ekki hefur verið gengið úr skugga um að þeir hafi ekki nælt sér í smitsjúkdóma meðan á helladvölinni stóð.

Björgunaraðgerðir hófust aftur klukkan fjögur í nótt og eru viðbragðsaðilar nokkuð vongóðir um framhaldið. Lítið hefur rignt síðustu daga og vatnsdæling hefur gengið vel. Því hefur vatnmagnið í hellinum minnkað hratt um helgina og fyrir vikið þurfa drengirnir ekki að kafa nema stutta leið. Bjögunaraðgerðir gærdagsins tóku um 8 klukkustundir, en sem fyrr segir tók ekki nema 6 klukkustundir að ná fimmta drengnum úr hellinum.

Búist er við því að fleiri drengir kom út úr hellinum uppúr hádegi. Vísir hefur fylgst með björgunaraðgerðunum í alla nótt og mun halda áfram að greina frá nýjustu vendingum um leið og þær gerast. Gert er ráð fyrir því að aðgerðirnir gætu staðið yfir í tvo sólarhringa í viðbót.

Allar nýjustu upplýsingar um björgunina má nálgast með því að smella hér.