Vara við svikapóstum í nafni Netflix

Valitor varar við svikapóstum sem sendir hafa verið í nafni Netflix til almennings, nú síðast í dag, að því er fram kemur í frétt á vef Valitors.

Efni póstanna er fölsk tilkynning um að „Netflix“, þ.e. svikafyrirtækið, sé í vandræðum með innheimtuupplýsingar viðkomandi og að hún eða hann þurfi að uppfæra kortaupplýsingar sínar. Póstarnir eru sendir á fólk hvort sem það er með áskrift að Netflix eða ekki.

Þá virðast sambærilegir tölvupóstar hafa verið sendir út í nafni Símans. Fólki er eindregið ráðið frá því að opna póstana. Þá er það beðið um að smella ekki á meðfylgjandi hlekki og gefa ekki upp kortaupplýsingar sínar. Hafi fólk brugðist við slíkum pósti er brýnt að hafa samband við þjónustuver Valitor.