Gjaldþrota bankar hafi ekki ritstjórnarvald

„Bannaðar fréttir birtar.“ Með þessum orðum kynnti Stundin áframhaldandi umfjöllun sína upp úr gögnum úr gamla Glitni, rúmu ári eftir að lögbann var sett á fréttaflutning blaðsins úr Glitnisskjölunum.

Umfjöllunin telur 12 síður í nýjasta tímariti Stundarinnar. Í henni er Bjarni Benediktsson, fjármálaráðherra, sagður hafa leitt viðskipti „Engeyginga í meira mæli en komið hefur fram,“ að nafn frænda hans, Benedikts Jóhannessonar, megi finna í gögnunum og að afskriftir tengdar fjölskyldu þeirra nemi 130 milljörðum króna.

Umfjöllunina má nálgast með því að smella hér.

Stundin vann fréttir upp úr Glitnisgögnunum í aðdraganda alþingiskosninga síðasta árs. Glitnir HoldCo, þrotabú hins fallna Glitnis, fór fram á lögbann á umfjöllunina, tveimur vikum fyrir kosningarnar, sem sýslumaður féllst á. Síðan eru liðnir 375 dagar.

Tvö dómstig komust þó að þeirri niðurstöðu að lögbannið hafi verið ólögmætt. Héraðsdómur Reykjavíkur hafnaði kröfum Glitnis HoldCo í febrúar síðastliðnum og var málinu áfrýjað til Landsréttar - sem staðfesti niðurstöðu héraðsdóms þann 5. október síðastliðinn. Ekki liggur fyrir hvort Glitnir HoldCo hafi í hyggju að áfrýja málinu til Hæstaréttar, en fresturinn til þess eru fjórar vikur.

Sjá einnig: „Ég óska þess innilega að þeir láti staðar numið hér“

Nýjasta tölublað Stundarinnar kom þó út þegar aðeins tæpar 3 vikur eru liðnar frá úrskurði Landsréttar. Forsvarsmenn blaðsins segja að engu að síður hafi verið ákveðið að halda umfjöllun úr gögnunum áfram og að ákvörðunin byggi á lögfræðilegum og siðferðislegum grunni.

Lögin óuppfærð

„Í fyrsta lagi kemur fram í lögum um kyrrsetningu og lögbann að þegar þrjár vikur eru liðnar frá synjun dómstóla falli lögbann niður. Þrjár vikur eru liðnar frá og með útgáfudegi þessa tölublaðs Stundarinnar,“ segir á vef blaðsins og bætt við að í lögbannslögum sé ekki gert ráð fyrir tilvist Landsréttar.

„Þannig kemur fram að lögbann haldist eftir áfrýjun til „æðri dóms“, en ef æðri dómur staðfestir ákvæði héraðsdóms um synjun um staðfestingu gerðar felli hún úr gildi frá dómsuppsögu þar. Æðri dómur, Landsréttur, hefur þegar úrskurðað lögbannið ólögmætt, og er því samkvæmt óuppfærðum lögum um lögbann metið óþarft af lögmönnum Stundarinnar að bíða niðurstöðu Hæstaréttar.“

Hvað siðferðisþáttinn varðar segja aðstandendur Stundarinnar að það geti vart talist réttlætanlegt að láta þrotabú banka stýra umfjöllun fjölmiðla. „[H]vað þá umfjöllunum sem renna stoðum undir að starfsmenn, eigendur og stórir viðskiptamenn bankans – þar á meðal einn valdamesti stjórnmálamaður landsins – hafi forðað persónulegum fjármunum sínum og komið þeim í var á sama tíma og þeir höfðu aðgengi að mikilvægum upplýsingum um alvarlegan vanda bankans.“

Nánar má fræðast um málið á vef Stundarinnar.