Heiðveig María skilar inn framboðslista sínum

Þrátt fyrir að teljast ókjörgeng, þrátt fyrir að hafa verið rekin úr félaginu hefur Heiðveig María Einarsdóttir, sjómaður og viðskiptalögfræðingur, nú skilað inn framboði sínu til stjórnar Sjómannafélags Íslands. Stjórnarkjör fer fram á næsta aðalfundi, sem fram fer í næsta mánuði. En, alls óvíst er hvort Heiðveig María fái að bjóða sig fram.

Fiskimenn á lista Heiðveigar

Framboðslistinn er sem hér segir eftirfarandi:

Formaður:

Heiðveig María Einarsdóttir, kokkur og háseti á Engey RE1

Varaformaður:

Sigurður Þórður Jónsson, kokkur á Viðey RE 50

Féhirðir:

Rúnar Gunnarsson netamaður á Fróða ÁR 38

Varaféhirðir:

Arilíus Smári Hauksson kokkur á Víkingi AK 100

Meðstjórnendur: Arnar Leó Árnason háseti á Höfrungi 111 AK 250, Friðrik Elís Ásmundsson netamaður á Bylgjunni VE 75 og Sturla Bergsson netamaður á Örfirisey RE 4.

Varamenn til stjórnar: Júlíus Jakobsson háseti Höfrungi 111 AK 250, Kjartan Thor Pálsson Netamaður, bátsmaður, stýrimaður á Viðey RE 50 og Víðir Lárusson 2. stýrimaður Örfirisey RE 4.

Mál sem Kolbrún Garðarsdóttir, lögmaður Heiðveigar, rekur fyrir félagsdómi vegna brottrekstursins, verður tekið fyrir í dag.

Áttu að vera málamyndakosningar

Ekki er ofsögum sagt að allt hafi logað í illdeilum innan Sjómannafélags Íslands vegna framboðs Heiðveigar Maríu. Vaninn er sá að um leið og auglýst er eftir framboðum, en engin dæmi eru um á seinni tímum að kosið hafi verið milli tveggja kosta, er listi kjörnefndar kynntur. Svo var ekki að þessu sinni enda var þessi kosning hugsuð til málamynda.

Samkvæmt lögum félagsins situr Jónas Garðarsson áfram sem formaður út næsta ár, fram að aðalfundi sem fram fer í desembermánuði. Áður en til þess kæmi að hann þyrfti að láta af störfum var hugmyndin sú að félagið yrði lagt niður í núverandi mynd, eftir sameiningu SÍ og nokkurra annarra félaga sjómanna. Þeim viðræðum var hins vegar slitið. Jónas hefur gefið það út að hann ætli ekki að gefa kost á sér.

Farmenn fá tiltal

Vísir leitaði svara við því, á skrifstofu SÍ, hvort listi kjörnefndar lægi fyrir en var tjáð af Guðbjörgu Elínu Friðfinnsdóttur að kjörnefnd væri ekki komin saman til að ganga frá listanum. Eftir að hafa ráðfært sig við þá sem á skrifstofunni voru benti Guðbjörg blaðamanni á að reyna að hringja á morgun til að leita upplýsinga. Þó framboðsfrestur hafi runnið út nú áðan.

Vísir ræddi jafnframt við Heiðveigu Maríu og spurði hana af hverju farmenn væru ekki á lista hennar, heldur aðeins fiskimenn? Hún sagði að mikið hafi verið reynt til að fá þá á lista, margir hafi tekið vel í það, aðrir ekki eftir atvikum. En svörin voru á þann veg að þeir farmenn sem hafi til dæmis sett nafn sitt við kröfu um félagsfund, þar sem til stóð að ræða brottvikningu Heiðveigar Maríu, hafi fengið ábendingar um að það væri ekki vel séð, að styðja hana. Fyrir liggur undirskriftalisti sjómanna þar sem rúmlega hundrað lýsa yfir stuðningi við lista Heiðveigar til stjórnar. „Fullfermi og nokkuð laust með,“ segir frambjóðandinn.

Heiðveig María segir að hún hafi ekki fengið að sjá félagatal en gagnrýni hennar á sitjandi stjórn hefur ekki síst snúið að skorti á upplýsingagjöf. Þannig liggur til að mynda ekki fyrir hversu margir eru í félaginu en talan 400 hefur verið nefnd.