Börðust við að halda hita á konunni niður fjallið

Önnur konan sem slasaðist við göngu á Grundarhnjúki í Gerðafjalli við Eyjafjörð er kominn niður af fjallinu, að því er fram kemur í tilkynningu frá Slysavarnarfélaginu Landsbjörg. Konan er nú á leið á sjúkrahús á Akureyri. Björgunarsveitarmaður sem tók þátt í aðgerðum í fjallinu í dag segir líðan konunnar hafa verið stöðuga en kappkostað var við að halda á henni hita niður fjallið í miklum kulda.

Sjá einnig: Báðar konurnar alvarlega slasaðar eftir hátt fall

Ólafur Ólafsson hjá slysavarnarfélaginu Landsbjörg var á vettvangi við Grundarhnjúk í dag. Hann segir í samtali við Vísi að björgunin hafi gengið ágætlega miðað við aðstæður en slæmt veður var á svæðinu í dag. Töluverðan tíma hafi tekið að koma upp tryggingum og línum og þá var mikil hálka og snjór í hliðinni.

Ólafur segir að konan, sem var á göngu í fjallinu ásamt tveimur konum, hafi strax verið flutt á sjúkrahús á Akureyri við komuna niður fjallið skömmu eftir klukkan 18 í kvöld. Hann segir að konan sé töluvert slösuð en líðan hennar hafi þó verið stöðug á leiðinni niður.

„Hún fór strax á sjúkrahús, hún var stabíl en mjög kalt. Við vorum að berjast við kuldann, halda á henni hita,“ segir Ólafur. Þá segir hann konuna hafa verið með meðvitund þegar sjúkraflutningamenn tóku við henni.

Tvær konur slösuðust við gönguna í dag en ljóst er að þær féllu úr töluverðri hæð. Viðbragðsaðilar telja að þær hafi runnið um 200-300 metra niður fjallið.

„Við áttum okkur ekki nákvæmlega á því hvaðan þær fóru af stað, skyggnið var orðið slæmt þegar við komum á staðinn,“ segir Ólafur.

Ólafur hafði ekki fengið fregnir af líðan hinnar konunnar, sem flutt var alvarlega slösuð til Reykjavíkur með sjúkraflugi. Hún er talin meira slösuð en konan sem flutt var niður af fjallinu. Alls tóku aðgerðir björgunarsveita um fjóra klukkutíma en allir voru á leið af vettvangi nú á sjöunda tímanum.

Fréttin hefur verið uppfærð með upplýsingum frá viðbragðsaðila á vettvangi. Í fyrstu tilkynningum um slysið frá björgunarsveitum kom fram að slysið hefði orðið í Fnjóskadal. Grundarhnjúkur er hins vegar í Gerðafjalli við Eyjafjörð. Þetta hefur verið leiðrétt.