Bjarki Már: Ekki verið að gera mér neinn greiða með að velja mig

„Skjótt skipast veður í lofti. Maður átti ekki alveg von á þessu,“ segir Bjarki Már Elísson, hornamaður íslenska landsliðsins í handbolta, en hann var mættur ásamt íslenska liðinu í Leifsstöð í morgun þaðan sem það flaug svo til München á HM 2019.

Eðlilega átti Bjarki ekki von á því að fara með enda var hann ekki einu sinni valinn í 20 manna æfingahóp íslenska liðsins. Guðmundur Guðmundsson vildi taka ákvörðun strax í valinu á milli hans og Stefáns Rafns Sigurmannssonar og var sá síðarnefndi fyrir valinu.

En, hlutirnir gerast hratt. Guðjón Valur Sigurðsson, stálmaðurinn sem hefur farið á hvert einasta stórmót með Íslandi frá árinu 2000, er meiddur og þá var hringt í Bjarka sem var hafnað fyrir jól en er nú mættur með Íslandi á HM.

„Ég var alltaf viðbúinn að það gæti eitthvað gerst. Ég þekki það af eigin reynslu enda verið í atvinnumennskunni lengi. Meiðsli geta komið þegar að maður býst síst við þeim. Ég var alltaf klár þegar og ef kallið kæmi en ég var ekkert að búast við því,“ segir Bjarki Már sem var þó ekki vongóður lengi vel.

Ég er nógu góður

„Þegar að Gummi hringir í mig og segir að maður sé ekki í hópnum reiknar maður ekki með því að fara en svo fékk maður boð um að fara til Noregs og þá gerði maður sér smá vonir,“ segir Bjarki.

„Ég var samt eiginlega alveg viss um að ég væri ekki að fara en síðan kemur þetta upp með Gauja og eins manns dauði er annars brauð. Ég er glaður með að fara en þetta er leiðinlegt fyrir Guðjón.“

Íþróttaheimurinn getur verið skrítinn. Bjarki Már var búinn að fá rautt ljós á HM-drauminn frá landsliðsþjálfaranum Guðmundi Guðmundssyni en tveimur vikum síðan er hann mættur í myndatöku með þjálfaranum á leiðinni til München.

„Þetta er skrítið, en eins og Gummi talaði um við mig þá hafði þetta ekkert með mína frammistöðu að gera. Það er ekki eins og og það sé verið að gera mér greiða með því að velja mig. Þetta snýst um að maður sé nógu góður og mér finnst ég vera nógu góður. Nú er bara að nýta þetta tækifæri sem maður fær og gera eitthvað af viti,“ segir Bjarki.

Látum nú verkin tala

Bjarki Már og Stefán Rafn hafa allan sinn feril þurft að vera á eftir Guðjóni Val í goggunarröðinni eins og fleiri menn enda Guðjón verið í landsliðinu og í fremstu röð í 20 ár. Þeir hafa alltaf talið sig nógu góða í samkeppninni við hvorn annan og nú fá þeir heldur betur tækifæri til að sýna sig í fjarveru fyrirliðans.

„Nú er nóg komið af því að tala um þetta og komið að því að sýna sig. Nú látum við bara verkin tala. Ég er bara mjög spenntur að sjá hvernig það kemur út. Ég treysti okkur báðum til að spila,“ segir Bjarki.

„Stefán er frábær leikmaður og ég er að spila á háu leveli líka. Nú er bara að láta kné fylgja kviði. Við höfum báðir spilað vel þegar að við höfum fengið mínútur í síðustu verkefnum. Við verðum bara að halda því áfram,“ segir Bjarki Már Elísson.

Allt viðtalið má sjá í spilaranum hér að neðan.