Sérfræðingurinn: Fúll í fyrstu en orðinn nokkuð sáttur

Jóhann Gunnar Einarsson, sérfræðingur Stöðvar 2 Sports, var fúll með frammistöðu Íslands strax að loknum sigrinum á Japan á HM í handbolta í dag en þegar á leið varð hann sáttari við leikinn enda Japan orðið gott lið í alþjóðahandboltanum.

„Fyrstu viðbrögð þá var maður hálf fúll út í frammistöðuna, en þegar maður var búinn að settla þetta inn þá áttar maður sig á að Japanarnir eru bara drullu góðir.“

„Við þurftum að vinna og við unnum. Það voru margir sem voru að spila undir sínu besta og þegar maður var aðeins búinn að jafna sig þá var maður sáttari með þetta.“

Fyrirfram var ætlast til þess að íslenska liðið myndi taka sigur, og jafnvel nokkuð auðveldan, en japanska liðið er sterkt og stóð heillengi í Evrópumeisturum Spánverja fyrr í mótinu.

„Það þarf að gefa hrós á Dag. Barein lendir fyrir ofan þá í Asíukeppninni, sem gefur sæti á HM, en í dag er Japan orðið miklu betra lið. Hann er að gera frábæra hluti og hann gerði bara næstum því allt sem þurfti.“

„Hann útfærði leikinn mjög vel og náði að stjórna hraðanum. Við bjuggumst kannski við svaka hraða frá Japan en hann ákvað halda tempóinu niðri. Japanir eru bara oðnir góðir í handbolta og þetta var erfiður leikur varnarlega, þeir eru úti um allt en við höldum þeim í 21 marki sem er gott.“

Björgvin og hornamennirnir bestir

Íslenska liðið átti sem áður segir ekkert sérstakan dag, en hverjir voru bestir að mati sérfræðingsins?

„Mér fannst Bjöggi [Björgvin Páll Gústavsson] góður, við komum illa út úr hálfleiknum en hann náði að loka á nokkur hraðaupphlaup og varði alltaf reglulega einn og einn bolta.“

„Stefán Rafn kom frábær inn í þetta, báðir hornamennirnir Arnór og Stefán fannst mér mjög góðir. Útilínan var að ströggla allan leikinn. Varnarleikurinn var fínn þó ég hafi smá áhyggjur af miðjublokkinni, hún leit stundum illa út.“

„Maður var kannski að vonast eftir því að þeir væru komnir lengra. Það er erfitt að spila þessa vörn, maður er út um allt og þarf mikið að tala, það þarf mikið að æfa og þeir þurfa að vera mjög tengdir.“

„Með 21 mark er erfitt að setja út á varnarleikinn en þegar vörnin brást þá brást hún svolítið illa sem er smá áhyggjuefni.“

Úrslitaleikur upp á þriggja ára planiðÍsland á lokaleik í riðlinum við Makedóníu á morgun og er sá leikur algjör úrslitaleikur um sæti í milliriðli. Hver er tilfinningin fyrir þeim leik?

„Við erum að fara í mjög skrýtinn leik held ég. Þeir spila nærri allan tímann 7 á 6 sem gerir þetta leiðinlegt á að horfa, spila hægt og eru skynsamir og leita að opnum færum. En gríðarlega mikilvægur leikur upp á þriggja ára planið hjá Gumma.“

„Að komast í milliriðlana, þó að við töpum öllu, þá græðum við miklu meira á að fara í þessar stóru þjóðir og fá leikina þar.“