Leiðin greið fyrir nýja stjórn Löfven

Þingmenn sænska Vinstriflokksins munu skila auðu í fyrirhugaðri atkvæðagreiðslu í sænska þinginu um Stefan Löfven, formann Jafnaðarmanna, sem næsta forsætisráðherra Svíþjóðar. Atkvæðagreiðslan fer að öllum líkindum fram á föstudag. Frá þessu greindi Jonas Sjöstedt, formaður Vinstriflokksins, í morgun.

Greint var frá því um helgina að samkomulag hafi náðst um nýja minnihlutastjórn Jafnaðarmanna og Græningja sem myndi njóta stuðnings Miðflokksins og Frjálslyndra – tveggja flokka sem hafa verið hluti bandalags borgaralegu flokkanna.

Í samstarfsyfirlýsingu Jafnaðarmanna, Græningja, Miðflokksins og Frjálslyndra var tekið fram að Vinstriflokkurinn skyldi ekki hafa nein áhrif á stefnu stjórnarinnar á kjörtímabilinu. Flokkarnir fjórir eru hins vegar ekki með meirihluta þingsæta og væru því engu að síður háðir stuðningi Vinstriflokksins, þar sem ólíklegt þykir að stuðningur kæmi úr röðum flokka á hægri vængnum.

Viðræður við Löfven

Sjöstedt sagðist fyrr í vikunni ekki ætla að greiða atkvæði með Löfven vegna þess sem fram kæmi í samstarfsyfirlýsingu nýrrar stjórnar. Eftir viðræður við Löfven síðustu daga, er það hins vegar niðurstaða Vinstriflokksins að greiða atkvæði með Löfven.

Kosningar fóru fram í Svíþjóð 9. september síðastliðinn og hefur erfiðlega gengið að mynda nýja stjórn. Hafa deilur meðal annars snúist um stöðu Svíþjóðardemókrata í sænskum stjórnmálum, en ýmsir flokkar hafa útilokað að eiga aðild að stjórn sem væri háð stuðningi flokksins, sem rekur harða stefnu í innflytjendamálum.