„Við höfðum ekki hugmynd um að hún væri ólétt“

Starfsmenn Hacienda Healthcare hjúkrunarheimilisins í Phoenix í Bandaríkjunum höfðu ekki hugmynd um að 29 ára kona, sem hefur verið í dái frá 1992, væri ólétt fyrr en fæðingin hófst í síðasta mánuði. Símtal hjúkrunarfræðings sýnir að fæðingin hafi komið þeim verulega á óvart og að fæðingin hafi gengið erfiðlega.

„Við erum ekki undirbúin fyrir þetta,“ sagði hjúkrunarfræðingurinn.

Símtalið, sem héraðsmiðillinn KNXV hefur birt, byrjar á því að hjúkrunarfræðingur gargar á annan að barnið sé að blána því það andi ekki. Eftir smá vandræði við að komast að heimilisfangi hjúkrunarheimilisins segir hún sjúkraflutningamanni að einn sjúklingur þeirra sé að eignast barn. Þau hafi ekki haft hugmynd um að hún hefði verið ólétt. Á einum tímapunkti heyrist konan segja við aðra konu: „Hún eignaðist barn!“.



Hin konan virtist mjög hissa og spurði hver hefði fætt barn. Svarið sem hún fékk var: „Sjáðu. Það er barn þarna.“

Sjá einnig: Fjölskylda konu sem eignaðist barn í dái æf



Endurlífgunartilraunir virkuðu eftir nokkrar mínútur og heyrðist barnið gráta á upptökunni. Bæði drengurinn og móðirin voru flutt á sjúkrahús og munu þau vera að jafna sig. Fjölskylda móðurinn, sem fór í dá þriggja ára gömul, hefur tekið barnið að sér. Í fyrri fregnum af málinu hafði ekki legið almennilega fyrir hve lengi konan hafði verið í dái.

Lögreglan og forsvarsmenn hjúkrunarheimilisins vinna nú hörðum höndum af því að komast að því hver hafi nauðgað konunni. Lífsýni hafa verið tekin af starfsmönnum Hacienda Healthcare en lögreglan hefur ekki tilkynnt hvort einhver liggi undir grun né hvort einhver hafi verið handtekinn.

Forsvarsmenn hjúkrunarheimilisins hafa ráðið fyrrverandi saksóknara til að kafa í málið og framkvæma umfangsmikla innri rannsókn.



Þá hafa heilbrigðisyfirvöld í Arizona fyrirskipað breytingar á öryggisviðmiðum hjúkrunarheimilisins. Fjölga eigi starfsmönnum og auka eftirlit.

Einhverjar fjölskyldu sjúklinga heimilisins eru þó ekki sáttar. Karina Cesena, móðir 22 ára konu sem þjáist af heilaskemmdum hefur sofið á stofu dóttur sinnar frá því upp komst um fæðinguna og segist ætla að gera það þar til sökudólgurinn finnst.



Hún segir dóttur sína eiga erfitt með að tjá sig og því viti hún ekki fyrir víst hvort brotið hafi verið á henni.