Guðmundur: Fjárfesting til framtíðar

Guðmundur Guðmundsson, landliðsþjálfari, var ánægður með ungu drengina okkar sem börðu frá sér í níu marka tapi gegn Frökkum, 31-22, í Köln í kvöld.

„Ég er ekki að velta mér upp úr þessu tapi þannig lagað. Ég er meira að horfa á leikinn í heild sinni og sjá hvað við gerðum og hvað við gerðum ekki,“ sagði Guðmundur í samtali við Tómas Þór Þórðarson í leikslok.

„Að lenda 6-0 undir gegn heimsmeisturunum í byrjun leiks er nánast dauðadómur en mér fannst liðið sýna stórkostlegan karakter. Við hægt og rólega unnum okkur inn í leikinn og þetta var orðinn leikur.“

„Hluti af því voru kornungir leikmenn sem leiftruðu af leikgleði. Við sáum Hauk koma með mörk og Teit koma með mörk og svo framvegis. Mér fannst varnarleikurinn ná sér á strik eftir að sóknarleikurinn náði sér á strik.“

Guðmundur segir að þegar liðið geri klaufaleg mistök gegn svona góðu liði eins og Frakklandi þá refsa þeir strax.

„Það var góð markvarsla í fyrri hálfleik. Það var margt mjög jákvætt við leikinn en í síðari hálfeik byrjum við ágætlega. Í síðari hálfleik fansnt mér við standa mjög vel en í sókninni gerum við okkur seka um reynsluleysi.“

„Við erum að troða boltanum inn á línu. Á móti Frökkum er það bannað. Þeir hirða alla slíka bolta og við náðum ekki að fylgja þessu nægilega vel eftir. Síðan datt markvarslan alveg niður.“

„Ég held að það séu bara varðir tveir boltar í síðari hálfleik og þá er þetta orðið mjög erfitt. Í heildina er ég að hugsa um það að ég er að láta Hauk sautján ára spila gegn heimsmeisturunum fyrir framan tuttugu þúsund manns.“

Haukur Þrastarson spilaði afar fínan leik er hann kom inn á en hann skoraði sitt fyrsta mark á stórmóti gegn heimsmeisturum Frakka. Guðmundur var ánægður með hann.

„Hann spilar megnið af leiknum og gerir það frábærlega. Ég er ánægður með leikstjórnina hjá honum og þetta fer allt í reynslubankann. Þetta er það sem við þurfum að fjárfesta í núna. Við erum með þriggja ára plan. Ég er búinn að segja það að þetta er fjárfesting til framtíðar.“

„Hún er nauðsynleg á þessum tímapunkti. Við erum að skipta út hægt og sígandi. Það eru að koma nýjir leikmenn inn og þeir verða að fá að spreyta sig.“

Guðmundur segir að þetta sé ekki bara reynsluferli fyrir ungu strákanna heldur einnig fyrir hann sem þarf að vera þolinmóður gagnvart þeim.

„Ég þarf líka að vera þolinmóður en við erum samt sem áður mjög gagnrýnir á þá. Við fórum yfir varnarleikinn frá því í gær á fundi. Við byrjuðum á því að fara yfir hvað við þurfum að læra af.“

„Þetta er bara hluti af þessu ferli. Það tekur 30-50 leiki að fá þessa reynslu. Við erum ekki bara komnir með það og það er ekkert við því að gera. Aðalatriðið er það að við komumst í milliriðil.“

„Við erum að reyna okkur hérna og ég get verið mjög stoltur af liðinu. Það var frábær varnarleikur og þó að sóknin hafi verið erfið var margt mjög gott. Það var sama núna; fyrri hálfleikur var flottur en þetta tekur tíma.“