Umfjöllun um tapið gegn Frakklandi: Forréttaborð framtíðarinnar

Ísland tapaði stórt í öðrum leik sínum í milliriðli HM 2019 í handbolta í kvöld þegar að liðið steinlá, 31-22, á móti heimsmeisturum Frakka sem virðast ansi líklegir til að verja titilinn á þessu móti.

Frakkarnir sýndu mátt sinn og megin á móti Íslandi sem var án tveggja bestu mann liðsins á mótinu, Arons Pálmarssonar og Arnórs Þórs Gunnarssonar, og komust í 6-0. Íslenska liðið skoraði ekki fyrr en eftir tæpar tólf mínútur en þá var markvörður Frakka búinn að skora tvívegis.

Þegar að allt stefndi í algjört afhroð fór Guðmundur að hræra í liðinu og datt niður á kornunga blöndu manna sem rifu sig í gang og unnu síðustu 20 mínútur seinni hálfleik, 11-9. En, holan var vitaskuld ansi djúp.

Eftir að minnka muninn mest niður í tvö mörk í byrjun seinni hálfleiks í 14-16 sögðu Frakkarnir hingað og ekki lengra, skoruðu sex mörk í röð og lögðu grunninn að afar sannfærandi sigri.

Haukur flaug hátt

Hlutirnir fóru almennilega að gerast þegar að Haukur Þrastarson, 17 ára gamall Selfyssingur, kom inn á en þetta undrabarn af Hurðabaksættinni stýrði sóknarleik Íslands eins og herforingi og vann Ísland kaflann sem að hann var inn á með tveimur mörkum í fyrri hálfleik.

Haukur hefur sýnt það í Olís-deildinni að hann er ekki hræddur við neitt og hann var það svo sannarlega ekki í kvöld. Honum er alveg sama hvort hann spilar á móti Gróttu eða Frakklandi. Handbolti er handbolti fyrir honum og hann er ævintýralega góður í íþróttinni þrátt fyrir ungan aldur.

Aron Pálmarsson, landsliðsfyrirliði og besti leikmaður Íslands, gat ekki annað en staðið upp í stúkunni og klappað þegar að Haukur skoraði sitt fyrsta mark á stórmóti. Hann þrumaði þá boltanum í skrefinu framhjá Vincent Gerard í marki Frakka.

Gerard hefur tvívegis orðið heimsmeistari og er markvörður Evrópumeistara Montpellier. Haukur varð bikarmeistari í fjórða flokki fyrir tveimur árum og var í vetur að selja klósettpappír í fjáröflun á milli þess sem að hann spilaði í Olís-deildinni. Hann hefur svo haldið sér uppteknum við heimalærdóm hér í Þýskalandi.

Ungir og óhræddir

Haukur stýrði sóknarleiknum með félaga sína frá Selfossi, Elvar Örn Jónsson (21 árs) og Teit Örn Einarsson (20 ára) sitthvoru megin við sig. Saman mynduðu þeir útilínu Selfoss í Olís-deildinni á síðustu leiktíð en voru nú þrír saman að reyna að skora á líklega bestu vörn heims.

Þeir gerðu sín mistök og nóg af þeim í raun en þeir hættu aldrei að reyna. Í kringum þá voru aðrir ungir menn eins og Ýmir Örn Gíslason sem spilaði nokkrar af sínum bestu mínútum í kvöld og stórmótanýliðinn Sigvaldi Guðjónsson gaf ekkert eftir í hægra horniun. Sömuleiðis fór Ágúst Elí vel af stað í markinu.

Þetta var alltaf erfitt án manna eins og Arons og Arnórs en á móti fékk íslenska þjóðin heilt forréttaborð af framtíðarleikmönnum Íslands og horfði á þá fylla vel á reynslubankann. Það var ekkert hægt að biðja um meira enda mótherjinn líklega sá besti á mótinu.

Og það voru ekkert bara ungu mennirnir. Strax í byrjun leiks, 4-0 undir, henti Bjarki Már Elísson sér á boltann til að bjarga innkasti. Það eru allir með í þessum samstillta og baráttuglaða hópi en gæðin voru bara langt því frá næg til að leggja Frakka í kvöld.

Klárað með gleði

Nú eiga strákarnir eftir einn leik og þeir sem héldu að það yrði einhver gúmmíleikur á móti Brasilíu þurfa að endurskoða þá pælingu. Brassar, sem eru vafalítið spútniklið mótsins, gerðu sér lítið fyrir og unnu Króata í kvöld.

Það eru samt aðeins nokkrar vikur síðan að Ísland vann Brasilíu á æfingamóti og auðvitað heimtum við sigur á móti Suður-Ameríkuþjóð hvort sem að Aron Pálmarsson er með eða ekki.

Strákarnir fá nú tvo daga til að hvíla sig og er sá tími kærkominn enda er liðið búið að spila fjóra leiki á fimm dögum og eini hvíldardagurinn var ferðadagur. Að sjálfsögðu er þetta sturlað fyrirkomulag en eitthvað sem handboltamenn eiga að venjast.

Lokaleikurinn verður prófraun út af fyrir sig. Fáum við áfram að sjá vilja og hungur þrátt fyrir áfallið í dag? Ætla menn að mæta eins til leiks á móti Brasilíu og fyrsta korterið í dag og grafa sér of djúpa holu?

Ungt lið Íslands fékk allt Ísland á sitt band í kvöld með hugrekki sínu og vilja og væri ekki léleg að launa samstöðuna með sigri í lokaleiknum.