Fyrrverandi forsætisráðherra Póllands er látinn

Jan Olszewski, fyrrverandi forsætisráðherra Póllands, er látinn. Hann andaðist á hersjúkrahúsi í pólsku höfuðborginni Varsjá seint í gærkvöldi. Hann varð 88 ára.

Olszewski gegndi embætti forsætisráðherra landsins í um hálft ár, frá desember 1991 til júní 1992.

Hann var lögfræðingur að mennt og íhaldssamur í skoðunum. Samband hans og Lech Wałęsa, sem var forseti Póllands í forsætisráðherratíð Olszewski, var mjög stirt þar sem ásakanir um valdaránsáform gengu á víxl.

Hann gegndi þingmennsku á árunum 1991 til 1993 og aftur 1997 til 2005.