Þúsundir yfirgefa heimili sín vegna skógarelda

Á fjórða þúsund manns hafa flúið heimili sín vegna skógarelda sem loga nú á Suðurey, annarri af tveimur aðaleyjum Nýja-Sjálands. Eldarnir áttu upptök sín nálægt borginni Nelson fyrir sex dögum, en hafa nú teygt anga sína um 35 kílómetra norðaustur að bænum Wakefield.

Veðurspár gera ráð fyrir sterkum vindum á svæðinu í dag og hafa yfirvöld varað við því að umfang eldsins geti aukist gríðarlega í dag vegna þess.

Um 70 þúsund manns búa á svæðinu sem talið er að eldurinn geti haft áhrif á og nokkurrar taugaspennu gætir meðal íbúa, að því er fram kemur í frétt BBC.

Viðbragðsaðilar hafa notast við 23 þyrlur og tvær flugvélar í tilraunum sínum til að ráða niðurlögum eldsins, sem af sérfræðingum er talinn versti skógareldur Nýja-Sjálands í meira en 60 ár.

Þá virðist veðrið ekki ætla að vera með eldhræddum Nýsjálendingum í liði en þrátt fyrir rigningarspá snemma í næstu viku mun úrkoman að öllum líkindum ekki ná til svæðisins þar sem eldarnir loga.