Sport

Van Gerwen í úrvalsdeildinni í pílu í kvöld: „Það eina sem skiptir máli er að vinna“

Óskar Ófeigur Jónsson skrifar
Michael van Gerwen elskar að vinna og hefur líka unnið marga sigra á ferli sínum í pílunni.
Michael van Gerwen elskar að vinna og hefur líka unnið marga sigra á ferli sínum í pílunni. Getty/Jordan Mansfield
Bestu pílumenn heims hafa sett stefnuna á það að komast í úrslitakeppni úrvalsdeildarinnar í pílu og nú geta Íslendingar fylgst með þessari spennandi keppni þeirra.

Úrvalsdeildin í pílu heldur áfram í kvöld og fjórða umferðin verður í beinni á Stöð 2 Sport frá klukkan 19.00.

Hollenski heimsmeistarinn Michael van Gerwen hefur verið í miklum ham í fyrstu þremur umferðunum og er með fullt hús eftir sannfærandi sigur á Rob Cross fyrir viku síðan. Það hefur verið mikið um flott tilþrif í ár eins og sjá má hér fyrir neðan.





Michael van Gerwen er með sex stig eða tveimur stigum meira en næstu menn sem eru Norður-Írinn Daryl Gurney, hinn velski Gerwyn Price og Skotinn Peter Wright.

Úrvalsdeildin í pílu er deildarkeppni þar sem ein umferð fer fram á kvöldi þar sem keppendur fá tvö stig fyrir sigur og eitt stig fyrir jafntefli. Í úrvalsdeildinni keppa níu bestu pílumenn heims og svo er einn gestur sem keppir á hverju kvöldi.

Eftir fjórtán umferðir fara fjórir efstu í úrslitakeppnina þar sem er keppt með útsláttarfyrirkomulagi.

Hver umferð fer fram á mismundandi stað. Fyrir viku var keppt í Dublin í Írlandi en í kvöld fer keppnin fram í Westpoint Arena í Exeter í Englandi.

Michael van Gerwen hefur unnið úrvalsdeildina þrjú ár í röð og það er gaman að fylgjast með þessum magnaða pílukastara.

„Ég er í efsta sætinu og ég vill vera þar áfram. Það eina sem skiptir máli er að vinna og ég elska það að spila fyrir framan stóran hóp af fólki,“ sagði Michael van Gerwen fyrir keppni kvöldsins.

Það er ekkert skrýtið að hann tali um stemmninguna á keppninni því hún er oftast svakalega skemmtileg.

Michael van Gerwen mætir Englendingnum James Wade í kvöld en Wade er í 5. sæti með 3 stig eftir jafntefli í síðustu umferð.

„Hinir spilararnir þurfa að leika vel til að vinna mig og ég þarf að passa upp á að ég haldi mér í góðu formi, spili vel og geri engin mistök. Ég er mjög ánægður með þessa þrjá sigra og get lítið kvartað en ég ætla mér þessu tvö stig í Exeter líka,“ sagði Michael van Gerwen.

Menn gera allt til þess að geta verið með eins og sjá má á viðtali við Michael Smith sem spilar í kvöld í gegnum mikinn sársauka og sýkingu. Smith komst í úrslitaleikinn á HM á dögunum en hefur ekki náð að fylgja því alveg eftir.

 



Viðureignir kvöldsins eru:

Luke Humphries (Gestur) - Gerwyn Price (3. sæti)

Daryl Gurney (2. sæti) - Rob Cross (6. sæti)

Mensur Suljovic (8. sæti) - Peter Wright (4. sæti)

Michael van Gerwen (1. sæti) - James Wade (5. sæti)

Michael Smith (9. sæti) - Raymond van Barneveld (7. sæti)





Útsendingin á Stöð 2 Sport hefst klukkan 19.00 og Páll Sævar Guðjónsson mun lýsa því sem fyrir augu ber eins og honum einum er lagið.

Aðrar íþróttir

Mest lesið


Fleiri fréttir

Sjá meira


×

Mest lesið