Bænastund í Selfosskirkju vegna Páls

Bænastund verður haldin í Selfosskirkju á morgun, fimmtudaginn 28. febrúar klukkan 18, vegna Páls Mars Guðjónssonar, sem leitað hefur verið að í Ölfusá síðan á mánudagskvöld. Þetta kemur fram í tilkynningu á Facebook-síðu kirkjunnar.

Bænastundin verður í umsjón presta Selfosskirkju og eru allir hjartanlega velkomnir, að því er segir í tilkynningu.

Leitin að Páli hefur ekki borið árangur en fjölmennt lið björgunarmanna hefur leitað í og við Ölfusá síðan á mánudag. Leit var hætt í kvöld á sjöunda tímanum en samkvæmt upplýsingum frá lögreglunni á Suðurlandi verður fylgst með ánni fram að helgi þegar leit hefst aftur af fullum þunga.