Greta til­nefnd til friðar­verð­launa Nóbels

Sænska stúlkan Greta Thunberg hefur verið tilnefnd til Friðarverðlauna Nóbels. Frá þessu greinir norska blaðið Verdens Gang.

„Sú hreyfing sem Greta hefur komið af stað er mjög mikilvægt framlag til friðar,“ segir Freddy André Øvstegård, þingmaður Sósíalíska vinstriflokksins í Noregi.

Øvstegård hefur ásamt samflokksmönnum sínum. Mona Fagerås og Lars Haltbrekken, tilnefnt hina sextán ára Gretu Thunberg. Hún vakti heimsathygli eftir að hún ákvað að skrópa í skólanum til að vekja athygli á ógnum loftslagsbreytinga.

„Við höfum tilnefnt Gretu þar sem loftslagsógnin getur verið ein helsta orsök stríðs og átaka,“ segir Øvstegård.

Á heimasíðu Friðarverðlauna Nóbels segir að búið sé að tilnefna 301 einstakling til verðlaunanna sem afhent eru í Noregi í desember á ári hverju.