Golfsýningin 2019 haldin í Smáranum

Golfsýningin 2019 fer fram í Smáranum í Kópavogi helgina 30-31.mars. Þetta verður í fyrsta sinn á Íslandi sem haldin er vörusýning sem eingöngu er tileinkuð golfíþróttinni. Golfsýningin er haldin í samstarfi við GSÍ og PGA á Íslandi og er markmið sýningarinnar að vekja athygli á íþróttinni sem og búa til vettvang þar sem kylfingar geta kynnt sér betur þær vörur og þá þjónustu sem í boði er.

„Golfíþróttin hefur vaxið gríðarlega á undanförnum árum og hafa kylfingar aldrei verið fleiri. Samhliða fjölgun kylfinga hefur aðstaða til golfiðkunar batnað og völlum hefur fjölgað. Það er markmið GSÍ og PGA að fjölga enn frekar iðkendum í golfi. Það er því fagnaðarefni að framtakssamir aðilar hafa nú ákveðið að efna til golfsýningar svo kylfingar og almenningur geti kynnt sér enn frekar kosti þess að leika golf,” segir Stefán Garðarsson, sölu- og markaðsstjóri  GSÍ.

PGA á Íslandi og GSÍ munu bjóða upp á fjölbreytta dagskrá þar sem hægt verður að kynnast golfíþróttinni. Boðið verður upp á SNAG golf fyrir yngstu kynslóðina, golfkennarar verða á staðnum, auk þess sem kylfingar geta reynt sig í golfhermum af bestu gerð. Golfdómarar munu kynna þær fjölmörgu breytingar sem nú hafa orðið á golfreglunum og einnig verður boðið upp á ýmsar golfþrautir.

Á sýningunni má finna vörur frá þekktustu kylfuframleiðendum heims en einnig vörur sem hafa ekki sést á Íslandi áður. „Allt frá PING og Taylor Made, yfir í lítið sprey frá Grip Boost sem bætir gripið,“ segir Björn Björnsson, einn skipuleggjenda sýningarinnar.

„Þarna verða ferðskrifstofur, skór, fatnaður, heilsurækt, kírópraktorar, golfhermar, fasteignasölur og allt annað sem tengist golfi með beinum eða óbeinum hætti. Það verður klárlega eitthvað fyrir alla á svæðinu en við lögðum mikinn metnað í að hafa sem fjölbreyttastan hóp sýnenda,” segir Björn.

„Hugmyndin kviknaði í lok síðasta sumars þar sem margir í kringum okkur spyrja sömu spurninganna varðandi golf; Hversu dýrt er þetta? Tekur þetta ekki rosalegan tíma? Hvernig byrjar maður? Rétt fyrir áramót ræddum við þetta aftur og vorum orðnir nokkuð spenntir fyrir að láta reyna á þetta. Þá var ekkert annað að gera en að heyra í GSÍ og PGA, sem tóku vel á móti okkur og á endanum small þetta saman,“ segir Björn.

Sýningin verður sem áður segir haldin helgina 30.-31. mars í íþróttasalnum Smáranum í Kópavogi. Opið verður báða dagana frá klukkan 10 til 16 og mun PGA á Íslandi, ásamt GSÍ, standa fyrir viðburðum og leikjum alla helgina. Hægt er að kynna sér sýninguna betur og hvaða sýnendur verða á svæðinu inni á golfsyningin.is.

„Það verður eitthvað fyrir alla, unga sem aldna og reynda sem óreynda kylfinga. Golf er fjölskylduíþrótt þar sem allir geta tekið þátt og markmið okkar er að gera þessa helgi að árlegum viðburði sem gefur kylfingum smá auka spennu fyrir sumrinu. Við vonumst til að sjá sem flesta um helgina,” segir Björn.

Þessi kynning er unnin í samstarfi við Golfsýninguna 2019