Ramos skorað í fimm landsleikjum í röð

Mark Sergios Ramos úr vítaspyrnu tryggði Spáni sigur á Noregi, 2-1, í undankeppni EM 2020 í Valencia í gær.



Ramos sýndi mikið öryggi þegar hann vippaði boltanum á mitt markið úr vítaspyrnunni. Þetta var sextánda mark hans á tímabilinu, það tíunda af vítapunktinum og það fimmta sem hann skorar með svokallaðri Panenka-vippu.

Ramos hefur nú skorað í síðustu fimm landsleikjum sem hann hefur spilað sem er ótrúleg tölfræði fyrir varnarmann.

Hann hefur alls skorað 18 mörk fyrir spænska landsliðið og er tólfti markahæsti leikmaður þess frá upphafi.

Spánverjar mæta Maltverjum á útivelli í öðrum leik sínum í undankeppni EM á þriðjudaginn.