Allt stopp á Suðurlandsvegi vegna bíls sem þveraði veginn

Löng bílaröð myndaðist á Suðurlandsvegi í austur í grennd við Litlu kaffistofuna nú á sjönda tímanum. Teppuna mátti rekja til bíls með hestakerru sem þveraði veginn, samkvæmt upplýsingum frá lögreglu á Suðurlandi. Hreyfing var þó komin á röðina um klukkan 18:30 að sögn bílstjóra á vettvangi.

Sveinn Kristján Rúnarsson yfirlögregluþjónn hjá lögreglunni á Suðurlandi sagði í samtali við Vísi á sjöunda tímanum að lögregla ynni að því að koma bílnum af veginum. Ekki var gert ráð fyrir að það tæki langan tíma en óhappið varð rétt ofan við Litlu kaffistofuna.

Líkt og sést á mynd sem tekin var á Suðurlandsvegi skömmu eftir klukkan 18 var bílaröðin ansi löng en sjónarvottur á svæðinu sagði hana ná til Reykjavíkur.