Sara í viðtali á CNN sem segir enga stærri CrossFit-stjörnu vera til í heiminum

Íslenska CrossFit drottningin Ragnheiður Sara Sigmundsdóttir hefur stimplað sig aftur inn í hóp þeirra hraustustu í heimi með frábærri frammistöðu sinni á árinu 2019.

Sara tryggði sér sæti á heimsleikunum með sigri á Strength in Depth CrossFit mótinu í London og fylgdi því síðan eftir með að vinna „The Open“ á dögunum.

Endurkoma Söru hefur vakið heimsathygli og þar meðal hjá CNN fréttstofuninni sem fékk Söru í viðtal þar sem hún ræðir bæði erfiðleikana sína á árinu 2018 og endurkomuna á árinu 2019.

CNN kynnir Söru inn í fréttinni með þeim orðum að í CrossFit-heiminum sé ekki til stærri stjarna en hin íslenska Sara Sigmundsdóttir sem CNN bendir á að sé með 1,4 milljón fylgjendur á Instagram og að hún fái alltaf mikinn stuðning hvar sem hún keppir.

Blaðamaður CNN fullyrðir líka að engin keppandi á CrossFit leikunum fái hærri hvatningarhróp en einmitt Sara.

Sara Sigmundsdottir has fought back from not one but two broken ribs, as she aims to win her first @CrossFitGames title.https://t.co/MLSbhPpMyNpic.twitter.com/fjuAeNokCl

— CNN Sport (@cnnsport) April 4, 2019

Ragnheiður Sara Sigmundsdóttir hefur þó enn ekki náð að vinna heimsleikana þrátt fyrir að vera oft í forystu, unnið tvö brons og oftast verið í toppbarráttunni. Þar að segja þar til í fyrra þegar hún varð að hætta keppni eftir að hafa rifbeinsbrotnað.

„Ég hef aldrei verið í eins góðu formi og ég var þarna. Ég hef aldrei verið hraustari og aldrei léttari á fæti. Mér leið frábærlega og fannst ég vera að toppa á réttum tíma. Ég var líka svo spennt að sýna hversu mikið ég hafði lagt á mig,“ sagði Sara.

Hún hafði keppt rifbeinsbrotin á leikunum 2017 og náð samt fjórða sætinu. Hún var búin að ná sér af því þegar hún braut annað rifbein í upphitun fyrir eina greinina á degi eitt.

„Ég var að reyna að fela meiðslin fyrir þjálfaranum mínum því ég vissi að hann hefði látið mig hætta keppni. Ég hugsaði að ef þetta er brot, þá er þetta bara brotið bein og ég get komist í gegnum það,“ segir Sara.

Sara kláraði níu greinar áður en sársaukinn varð of mikill og hún tók þá ákvörðun að hætta keppni. Reyndar var þjálfarinn sem dró hana úr keppni því hún gat það ekki sjálf.

„Þetta var erfiðasta ákvörðunin sem ég hef tekið á ævinni. Ég hafði klárað þrautbrautina í þyngingarvestinu, ég hefði klárað jafnhendinguna og ég hafði klárað réttstöðulyftuna,“ sagði Sara.

„Ég hugsaði því að það væri ekki mikið verra sem ég þurfti að komast í gengum. Þá kom þessi skrýtna grein þar sem við þurftum að draga hluti og ég man bara eftir sársaukanum. Ég hugsaði því um það hvort að tíunda sætið væri þess virði að meiðast meira,“ sagði Sara.

Sara hætti keppni en snéri aftur sex mánuðum seinna í mögnuðu formi og hefur staðið sig betur og betur með hverri keppni. Það átti enginn þannig möguleika í hana í opna hluta undankeppni heimsleikanna.

Með því að vinna „The Open“ hafði Sara í raun tryggt sér tvisvar þátttökurétt á heimsleikunum 2019 þá sem hún dreymir um að vinna í fyrsta sinn. Það má lesa allt viðtalið hér.