Fjárhæð skaðabóta engin takmörk sett segir landbúnaðarráðherra

Fjárhæð skaðabóta sem ríkið gæti þurft að greiða vegna ólögmætra innflutningshindrana á búvörum er engin takmörk sett að sögn sjávarútvegs- og landbúnaðarráðherra. Hann mælti fyrir frumvarpi sem heimilar innflutning á fersku kjöti á alþingi í gær.

Frumvarpið kveður á um afnám núverandi leyfisveitingakerfis vegna innflutnings á landbúnaðarafurðum innan evrópska efnahagssvæðisins og breytingar á lögum um dýrasjúkdóma. Frumvarpinu er meðal annars ætlað að bregðast við áhrifum dóma EFTA-dómstólsins og Hæstaréttar Íslands sem fallið hafa gegn íslenska ríkinu vegna þeirra innflutningshafta sem ríkja í núgildandi löggjöf.

„Niðurstaða dómstóla er skýr. Íslensk stjórnvöld hafa ekki staðið við sínar skuldbindingar. Þau brot eru sögð vísvitandi og alvarleg. Staða málsins í dag er annars vegar ótakmörkuð skaðabótaskilda íslenska ríkisins vegna innflutnings á ófrystu kjöti. Þetta þýðir að hver sem reynir að flytja inn ófrosið kjöt og er stöðvaður getur fengið fyrir það skaðabætur frá íslenska ríkinu en fjárhæð skaðabóta eru engin takmörk sett,” sagði Kristján Þór Júlíusson, sjávarútvegs- og landbúnaðarráðherra er hann mælti fyrir frumvarpinu á Alþingi í gær.

Frumvarpið hefur mætt nokkurri andstöðu, meðal annars af hálfu Bændasamtakanna, og þá hafa einstaka þingmenn lýst efasemdum sínum um málið, einkum af ótta við aukna hættu sem stafi af sýklalyfjaónæmi. Meðal þeirra er Birgir Þórarinsson, þingmaður Miðflokksins. „Hér er á ferðinni stórmál sem getur haft alvarlegar afleiðingar fyrir búfjárstofna okkar og þar með okkar hreina landbúnað og auk þess varðar málið lýðheilsu landsmanna,” sagði Birgir í pontu þingsins í gær.

„Hver kemur til með að bera skaðabótaskyldu gagnvart bændum ef það gerist sem getur gerst, að hingað beri til landsins búfjársjúkdómasmit sem hafa aldrei komið til landsins?” spurði Birgir. Kristján Þór svaraði andsvörum á þá leið að ef hægt verði að rekja einhver áföll til lagasetningar þingsins þá liggi fyrir að ríkissjóður myndi bera þann kostnað.