Leikmenn PSG rifust: „Þú gefur boltann bara til baka“

Neymar og Julian Draxler, leikmönnum Paris Saint-Germain, lenti saman eftir tap liðsins fyrir Montpellier í frönsku úrvalsdeildinni í síðustu viku. PSG komst tvisvar yfir í leiknum en endaði á því að tapa, 3-2.

Neymar og Draxler rifust heiftarlega í búningsklefanum eftir leik. Neymar tók ekki vel í kvartanir Draxlers og á að hafa öskrað á liðsfélaga sinn: „Þú hefur ekki efni á að tala svona við mig. Þú gefur boltann bara til baka.“

Thomas Tuchel, knattspyrnustjóri PSG, og Antero Henrique, íþróttastjóri félagsins, þurftu að skilja Neymar og Draxler að áður en þeir létu hnefana tala.

Allt hefur gengið PSG í óhag að undanförnu. Liðið hefur aðeins unnið einn af síðustu sex deildarleikjum sínum, tapaði fyrir Rennes í bikarúrslitum og féll úr leik fyrir Manchester United í 16-liða úrslitum Meistaradeildar Evrópu.

Þrátt fyrir slakt gengi á undanförnum vikum er PSG löngu búið að tryggja sér franska meistaratitilinn. Liðið hefur orðið franskur meistari sex sinnum á síðustu sjö árum.

Neymar er nýbyrjaður að spila aftur með PSG eftir meiðsli. Brassinn, sem er dýrasti fótboltamaður allra tíma, hefur skorað 22 mörk í 25 leikjum í öllum keppnum á tímabilinu.

Enginn leikmaður hefur leikið fleiri leiki fyrir PSG í vetur en Draxler (41). Þjóðverjinn kom til PSG frá Wolfsburg 2017.