Gary Martin sá síðasti til að skora hjá Skagamönnum

Síðasti leikmaðurinn til að skora hjá Skagamönnum í Pepsi Max deildinni er ekki lengur að spila í deildinni.

Það er ekki aðeins erfitt að fá stig á móti nýliðum Skagamanna því mótherjum þeirra gengur bölvanlega að skora hjá þeim þessa dagana.

Árni Snær Ólafsson, markvörður og fyrirliði Skagamanna, hélt hreinu í þriðja leiknum í röð í gær þegar Skagamenn unnu 2-0 sigur á Stjörnunni í sjöttu umferð Pepsi Max deild karla.

Með þessum sigri, þeim fimmta í fyrstu sex leikjunum, þá héldu Skagamenn þriggja stiga forskoti á toppi Pepsi Max deildar karla. Þeir hafa náð í sextán stig af átján mögulegum.

Árni Snær er þar með búinn að halda marki sínu hreinu í 302 mínútur eða í öllum leikjum liðsins undanfarna fimmtán daga.

Síðastur til að skora hjá Skagamönnum er leikmaður sem er ekki einu sinni lengur í Pepsi Max deildinni.

Gary John Martin skoraði hjá Árna Snæ úr vítaspyrnu á 58. mínútu í 2-1 sigri ÍA á Val á Hlíðarenda 11. maí síðastliðnum. Síðan þá hefur engum öðrum leikmanni í Pepsi Max deildinni tekist að koma boltanum framhjá Árna Snæ.

Valsmenn gengu frá starfslokasamningi við Gary Martin í síðustu viku en leikurinn á móti ÍA var síðasti leikur enska framherjans fyrri Hlíðarendafélagið.

Þetta mark Gary kom eins og áður sagði úr vítaspyrnu. Síðastur til að skora hjá ÍA í opnum leik var Fylkismaðurinn Geoffrey Castillion í 2-2 jafntefli Fylkis og ÍA í Árbænum. Frá því marki hafa mótherjar Skagamanna ekki skorað markúr opnum leik í 379mínútur.

Árni Snær Ólafsson í marki Skagamanna í sumar:

27. apríl - Fékk á sig eitt marki í sigri á KA

1. maí - Hélt hreinu í bikarleik á móti Augnablik

5. maí - Fékk á sig tvö mörk í jafntefli við Fylki

11. maí - Fékk á sig eitt mark í sigri á Val

15. maí - Hélt hreinu í sigri á FH

19. maí - Hélt hreinu í sigri á Breiðabliki

26. maí - Hélt hreinu í sigri á Stjörnunni

Fæst mörk fengi á sig í fyrstu sex umferðum Pepsi Max deildar karla 2019:

4 mörk á sig - ÍA og Breiðablik

6 mörk á sig - KR og Grindavík

7 mörk á sig - KA og Fylkir

8 mörk á sig - HK

9 mörk á sig - FH og Stjarnan

10 mörk á sig - Valur

13 mörk á sig - Víkingur og ÍBV