Alfreð valinn þjálfari ársins á síðasta tímabili sínu með Kiel

Alfreð Gíslason er besti þjálfari ársins í þýsku deildinni en hann er á lokatímabili sínu með Kiel.

Alfreð kveður Kiel í vor eftir ellefu ára starf en hann fékk í dag verðlaun sem besti þjálfari deildarinnar í fjórða sinn á ferlinum. Það eru þjálfarar og framkvæmdastjórar deildarinnar sem kusu.

Alfreð gerði Kiel að þýskum bikarmeisturum á dögunum og hann á enn möguleika á að vinna þýsku deildina í lokaumferðinni en Kiel þarf reyndar að vinna upp tveggja stiga forystu Flensburg.

Wow. Niklas Landin und Alfred Gislason sind Torhüter und Trainer der Saison in der @dkbhbl. Absolut verdient. Herzlichen Glückwunsch! #WirSindKiel#NurMitEuch#newshttps://t.co/eSKXJbmJ4w

— THW Kiel (@thw_handball) June 6, 2019

Kiel hefur náð í 60 af 66 mögulegum á þessari leiktíð en þarf að treysta á það að Flensburg tapi stigum í lokaumferðinni á móti Bergischer HC.

Alfreð var einnig valinn þjálfari ársins í þýsku deildinni 2002, 2009 og 2012. Árið 2002 var hann þjálfari Magdeburgar en hin skiptin var hann þjálfari Kiel.

Þetta verður væntanlega 22. og síðasta ár Alfreðs Gíslasonar í þýsku deildinni en einhver orðrómur er um að hann þjálfi mögulega lið í annarri deild næsta vetur.

Daninn Rasmus Lauge Schmidt hjá Flensburg var valinn leikmaður ársins og landi hans Niklas Landin hjá Kiel var kosinn besti markvörður deildarinnar.