Mayor tryggði Þór/KA sigur á Selfossi

Þór/KA hafði betur gegn Selfossi í fyrsta leik sjöttu umferðar Pepsi Max deildar kvenna í kvöld.

Sandra Stephany Mayor kom gestunum frá Akureyri yfir eftir rúmlega tíu mínútna leik á Selfossi. Bæði lið fengu nóg af færum til þess að bæta við en það gekk ekki, staðan 1-0 fyrir Þór/KA í hálfleik.

Seinni hálfleikur var ekki eins fjörlegur en bæði lið áttu þó sín færi. Fleiri mörk komu ekki í leikinn og mark Mayor reyndist sigurmarkið.

Þór/KA fer því í 12 stig og heldur þriðja sætinu í deildinni. Selfoss er með 6 stig í því áttunda og gætu dottið niður í fallsæti ef KR vinnur Keflavík á morgun.

Upplýsingar um úrslit og gang leiksins eru fengnar frá Fótbolta.net.