Tap gegn Kýpur í síðasta leik

Íslenska karlalandsliðið í blaki tapaði öllum leikjum sínum á Smáþjóðaleikunum í Svartfjallalandi eftir tap í síðasta leiknum á móti Kýpur.

Íslenska liðið hafði unnið eina hrinu í öllum leikjum sínum á leikunum til þessa en Kýpverjar reyndust of stór biti fyrir íslenska liðið og þeir tóku allar hrinurnar þrjár og leikinn 3-0.

Kýpur vann fyrstu hrinu með yfirburðum 25-15, önnur hrina fór 25-13 og sú þriðja 25-16. Gríðarlega öruggur sigur hjá Kýpur.

Alexander Arnar Þórisson var stigahæstur í íslenska liðinu með átta stig.