Frá Mogganum til Kjarnans

Eyrún Magnúsdóttir hefur verið ráðin framkvæmdastjóri Kjarnans. Hún hefur þegar hafið störf að því er Kjarninn greinir sjálfur frá.

Eyrún hefur verið umsjónarmaður og ritstjóri Sunnudagsblaðs Morgunblaðsins undanfarin sjö ár. Þar áður sinnti hún ráðgjafarstörfum sem sneru meðal annars að verkefnastjórnun, markaðs- og útgáfumálum auk stefnumótunarvinnu.

Þá var hún einn stjórnenda Kastljós á árum sínum hjá RÚV frá 2004-2006. Hún er með BA-gráðu í hagfræði með sagnfræði sem aukagrein. Þá hefur hún lokið meistaranámi í stjórnun og stefnumótun frá viðskiptafræðideild Háskóla Íslands.

Hjalti Harðarson gegndi stöðu framkvæmdastjóra Kjarnans til byrjunar árs 2018 þegar hann söðlaði um. Þórður Snær Júlíusson, ritstjóri Kjarnans, hefur sinnt framkvæmdastjórastöðunni samhliða ritstjórnarstörfum síðan þá.