Espanyol bíður Stjörnunnar í næstu umferð

Stjarnan mætir spænska liðinu Espanyol í annari umferð forkeppni Evrópudeildarinnar ef liðið nær að leggja Levadia Tallinn að velli. KR og Breiðablik fara til austur Evrópu.

Dregið var í aðra umferðina í höfuðstöðvum UEFA í dag en leikirnir fara fram 25. júlí og 1. ágúst.

Espanyol varð í sjöunda sæti La Liga á síðasta tímabili en þetta er í fyrsta skipti síðan tímabilið 2006-2007 sem Espanyol tekur þátt í Evrópukeppni. Þá fór liðið alla leið í úrslit Evrópudeildarinnar, sem þá hét þó Evrópubikarinn.

Fyrri leikur einvígis Espanyol og sigurvegara einvígis Stjörnunnar og Levadia Tallinn verður á Spáni.

Leggji KR Molde að velli mæta KR-ingar annað hvort Cukaricki frá Serbíu eða Banants frá Armeníu í annari umferð. Fyrri leikurinn verður á Meistaravöllum og sá síðari ytra.

Breiðablik dróst gegn Zeta frá Svartfjallalandi eða Fehervar frá Ungverjalandi, en Blikar þurfa fyrst að sigra Vaduz frá Lichtenstein. Fyrri leikur þessa einvígis yrði ytra.