Prestur skrifar bók um líkfund

„Þetta hefur ekkert með það að gera að ég sé prestur,“ segir Fritz Már Jörgensson, rithöfundur og prestur við Keflavíkurkirkju, sem gaf á dögunum út sína fjórðu glæpasögu.

Bókin ber titilinn Líkið í kirkjugarðinum og fjallar um konu sem áreitt er af eltihrelli og um líkfund í Hólavallakirkjugarði.

Fritz segist ánægður með viðtökurnar. „Það hefur gengið ótrúlega vel, það er gaman að gefa út bók í byrjun sumars og í kilju. Krimmarnir passa vel í kiljuformið.“

Fritz segir titil bókarinnar ekki vera tilvísun í prestsstörf hans.

„Nafnið á bókinni er bara tilvísun í söguna, ég les mikið og hef alltaf haft gaman af því að skrifa, norrænu krimmarnir eru uppáhalds bækurnar mínar og urðu til þess að ég byrjaði að skrifa sjálfur.“