Toppbaráttan í Inkasso-deildinni áfram opin upp á gátt eftir dramatík kvöldsins

Þór er áfram í öðru sætinu, Grótta í því þriðja, Leiknir í því fjórða og Víkingur Ólafsvík í því fimmta eftir þá fjóra leiki sem fóru fram í fimmtándu umferð Inkasso-deildar karla í kvöld.

Þór fékk Víking Ólafsvík í heimsókn í kvöld. Rick Ten Voorde kom Þór yfir á 33. mínútu en í uppbótartíma jafnaði Harley Willard metin og lokatölur 1-1.

Þór er í öðru sætinu, fjórum stigum á eftir toppliði Fjölnis sem á leik til góða. Ólafsvík er í fimmta sætinu, fimm stigum frá Þór.

Leiknir virtist vera vinna sinn fjórða leik í röð er liðið var 2-0 yfir gegn Gróttu á heimavelli eftir tvö mörk frá framherjanum Sóloni Breka Leifssyni.

Gróttu-menn komu hins vegar til baka og Valtýr Már Michaelsson og Pétur Theódór Árnason sáu til þess að liðin skildu jöfn 2-2 en jöfnunarmarkið kom á 57. mínútu.

Leiknismönnum mistókst því að komast upp fyrir Gróttu en liðin eru í þriðja og fjórða sæti deildarinnar. Grótta er með 25 stig en Leiknir sæti neðar með 27.

Keflavík vann grannaslaginn gen Njarðvík, 1-0, en Frans Elvarsson skoraði eina markið á 91. mínútu leiksins. Ellefu mínútum áður hafði Rúnar Þór Sigurgeirsson fengið rautt spjald í liði Keflavíkur.

Keflavík er aftur komið upp um miðja deild en liðið er í 6. sæti deildarinnar með 22 stig. Grannarnir í Njarðvík eru hins vegar í vandræðum því þeir eru í 11. sætinu með 10 stig.

Það var markasúpa í Laugardalnum er Þróttur vann 4-2 sigur á Haukum. Staðan var 2-2 eftir þrettán mínútur og 4-2 fyrir Þrótti í hálfleik. Fleiri urðu mörkin ekki í leiknum en Rafael Victor skoraði þrjú mörk fyrir Þrótt.

Þróttur er í sjöunda sætinu eftir sigurinn í kvöld en Haukar eru tveimur sætum neðar, fjórum stigum frá fallsæti.

Úrslit og markaskorarar eru fengnir frá úrslit.net.

Staðan í heild sinni:

1. Fjölnir 32 stig

2. Þór 28 stig

3. Grótta 27 stig

4. Leiknir R. 25 stig

5. Víkingur Ó. 23 stig

6. Keflavík 22 stig

7. Þróttur 21 stig

8. Fram 20 stig

9. Haukar 14 stig

10. Afturelding 13 stig

11. Njarðvík 10 stig

12. Magni 10 stig