Glódís fyrirliði í sigri á gamla liðinu sínu

Glódís Perla Viggósdóttir var með fyrirliðabandið hjá Rosengård sem vann 2-1 sigur á Eskilstuna United í sænsku úrvalsdeildinni í dag.

Glódís fagnaði þarna sigri gegn sínu gamla liði en hún lék með Eskilstuna á árunum 2015-17.

Rosengård er enn með þriggja stiga forskot á toppi deildarinnar. Liðið hefur unnið fjóra af síðustu fimm leikjum sínum.

Anam Imo skoraði bæði mörk Rosengård í dag. Hún kom liðinu yfir strax á 2. mínútu og staðan í hálfleik var 1-0, heimakonum í vil.

Loreta Kullashi jafnaði á 56. mínútu en þegar þrjár mínútur voru til leiksloka skorað Imo sitt annað mark og tryggði Rosengård stigin þrjú.