Spenna á lokamóti FedEx mótaraðarinnar

Brooks Koepka er efstur eftir annan hringinn á Tour Championship mótinu í golfi en mótið er það síðasta í úrslitakeppninni um FedEx bikarinn.

Kylfingar komu inn á þetta mót með „forgjöf“ út frá árangri þeirra á mótinu á undan. Justin Thomas kom því inn í mótið á -10, Brooks Koepka á -7 og Rory McIlroy á -5.

Koepka lék vel í dag. Hann lék hringinn á þremur höggum undir pari líkt og McIlroy og er samtals á 13 höggum undir pari. McIlroy og Thomas eru jafnir í öðru sæti, höggi á eftir Koepka.

Xander Schauffele, sem var efstur ásamt Koepka og Thomas eftir fyrsta hringinn, lék á einu höggi undir pari og er í fjórða sætinu á 11 höggum undir.

Aðeins þrjátíu efstu á stigalistanum unnu sér þátttökurétt á þessu lokamóti en í boði eru fimmtán milljónir dollara, 1,9 milljarða íslenskra króna, fyrir sigurvegarann. Verðlaunafé sigurvegarans hækkaði um fimm milljónir dollara á milli ára.

Mótið er í beinni útsendingu á Stöð 2 Golf og stendur útsendingin á morgun yfir frá klukkan 17-22.