Patrekur setti Íslandsmet á Opna franska meistaramótinu í París

Íslenski spretthlauparinn Patrekur Andrés Axelsson úr Ármanni setti í gær nýtt Íslandsmet í 400 metra hlaupi á Opna franska meistaramótinu sem nú stendur yfir í París í Frakklandi.

Samstarf Patreks og Helga Björnssonar, nýs leiðsöguhlaupara Patreks, byrjar því mjög vel. Þetta kemur fram á heimasíðu Íþróttasambands fatlaðra.

Patrekur kom í mark á tímanum 58,28 sekúndum en lágmarkið fyrir HM í Dubai í nóvembermánuði er 57,00 sekúndur. Í gær reyndi Patrekur einnig við lágmark í 100 metra hlaupi og kom þá í mark á tímanum 12,43 sekúndur en lágmarkið fyrir HM er að hlaupa á 12,10 sekúndum.

Mótið í Frakklandi er síðasta mótið í Grand Prix mótaröð IPC fyrir HM en lágmarkatímanum fyrir HM í Dubai lykur þann 30. september næstkomandi svo enn er möguleiki fyrir Patrek að ná lágmörkum inn á HM.

Patrekur keppir í dag í 200 metra hlaupi í flokki blindra (T11) en sú grein virkar ekki til lágmarka fyrir HM þar sem flokkur T11 hleypur ekki 200 metra hlaup á heimsmeistaramótinu.