Pétur Árni í HK

Pétur Árni Hauksson hefur gengið til liðs við HK og mun spila með liðinu í Olísdeild karla í vetur.

HK tilkynnti um komu Péturs í dag en hann er 21 árs gömul örvhent skytta og kemur til HK frá ÍR. Pétur hefur spilað með öllum yngri landsliðum Íslands.

HK, sem er nýliði í Olísdeildinni í vetur, hafði fengið til sín georgískan landsliðsmann að nafni Giorgi Dikhaminjia en sendi hann heim á dögunum þar sem hann þótti ekki standa undir væntingum. Pétur er líklega hugsaður inn í hans stað.

Olísdeild karla fer í gang á nýjan leik á morgun en HK spilar ekki sinn fyrsta leik fyrr en á miðvikudag þegar liðið fer á Ásvelli og mætir Haukum.