Haukar rúlluðu yfir Njarðvík í mikilvægum fallbaráttuslag

Haukar náðu í afar mikilvæg þrjú stig í kvöld er liðið vann öruggan 4-0 sigur á Njarðvík í 20. umferð Inkasso-deildarinnar.

Luka Kostic tók við Haukaliðinu undir lok ágústmánaðar og tapaði 2-0 fyrir Leikni í sínum fyrsta leik.

Það var hins vegar aldrei spurning hvoru megin sigurinn myndi enda í kvöld. Staðan var 3-0 í hálfleik eftir tvö mörk frá Kristófer Þórðarsyni og eitt frá Sean de Silva.

Haukarnir bættu svo við fjórða markinu stundarfjórðungi fyrir leikslok er Kristófer innsiglaði þrennuna. Lokatölur 4-0.

Haukar eru því komnir upp fyrir Aftureldingu og sitja nú í 9. sætinu með 19 stig. Njarðvík er á botninum með fimm stig en á milli liðanna eru Magni með 16 stig og Afturelding með 19.

Bæði Magni og Afturelding eiga þó leik til góða um helgina.

Úrslit og markaskorarar eru fengnir frá úrslit.net.