Máni gáttaður á orðum Óla Stefáns: „Aldrei heyrt annað eins rugl á ævi minni“

Eftir sigurinn á Fylki, 4-2, í lokaumferð Pepsi Max-deildar karla í gær lýsti Óli Stefán Flóventsson, þjálfari KA, yfir óánægju sinni með umfjöllun Pepsi Max-markanna um sitt lið og tók nokkuð sterkt til orða.

„Það eru náttúrulega alls konar sérfræðingar hér og þar sem tala og það hefur áhrif á einhverja í umhverfinu. Á meðan gagnrýnin er heiðarleg er það ekkert mál. En ég var rosalega ósáttur við óheiðarlega gagnrýni þar sem orð mín voru tekin úr samhengi og þeim snúið okkur í óhag,“ sagði Óli Stefán.

„Það finnst mér óheiðarlegt og siðlaust. Ég var ósáttur við það en gagnrýnið eins og þið viljið, ekkert mál. Ég þoli það alveg.“

Þorkell Máni Pétursson var spurður út í ummæli Óla Stefáns í lokaþætti Pepsi Max-markanna.

„Siðleysi? Ég hef aldrei heyrt annað eins rugl á ævi minni. Notaði hann virkilega þetta orð? Við skulum þá vona að hann þurfi aldrei nokkurn tímann þurft að upplifa siðleysi,“ sagði Máni.

„Ég skil ekki svona viðkvæmni. Hér er verið að halda úti sjónvarpsþætti og menn segja sína skoðun. Það er mjög skrítið að menn taki eitthvað bull sem ég segi svona nærri sér. Það finnst mér grafalvarlegt mál. Óli ætti að skoða af hverju hann tekur þetta svona nærri sér. En mér finnst hann hafa gert fínt mót. Fimmta sæti fyrir KA er bara nokkuð gott. En hann verður ekki langlífur í starfi ef hann álítur svona litla gagnrýni siðleysi. Ég á ekki til orð yfir þessu.“

Innslagið í heild sinni má sjá í spilaranum hér fyrir ofan.