Rúnar markahæstur í sigri á Silkeborg

Það var Íslendingaslagur í dönsku úrvalsdeildinni í handbolta í dag þegar Ribe-Esbjerg fékk Bjerringbro-Silkeborg í heimsókn.

Óhætt er að segja að Íslendingarnir í liði Ribe-Esbjerg hafi verið allt í öllu í leik liðsins þar sem Rúnar Kárason var markahæsti maðurinn á vellinum með 9 mörk og 5 stoðsendingar. Gunnar Steinn Jónsson gerði 5 mörk og Daníel Þór Ingason bætti 3 mörkum í sarpinn.

Lauk leiknum með fjögurra marka sigri Ribe-Esbjerg, 30-26 en Þráinn Orri Jónsson komst ekki á blað í liði Bjerringbro-Silkeborg.