Desem­ber­upp­bót at­vinnu­leit­enda verður 84 þúsund

Ásmundur Einar Daðason, félags- og barnamálaráðherra, hefur sett reglugerð um greiðslu desemberuppbótar til atvinnuleitenda. Óskert desemberuppbót er 83.916 krónur og hækkar því um tæpar þrjú þúsund krónur frá því í fyrra, þegar hún var 81 þúsund krónur.

Atvinnuleitendur með börn á framfæri fá jafnframt sérstaka desemberuppbót fyrir hvert barn yngra en 18 ára, að því er fram kemur í tilkynningu frá félagsmálaráðuneytinu.

Rétt á fullri desemberuppbót eiga þeir atvinnuleitendur sem hafa verið að fullu tryggðir innan atvinnuleysistryggingakerfisins, hafa verið skráðir án atvinnu hjá Vinnumálastofnun í samtals tíu mánuði eða lengur á árinu 2019 og hafa staðfest atvinnuleit á tímabilinu 20. nóvember til 3. desember 2019.

Greiðsla desemberuppbótar til þeirra sem eiga ekki fullan bótarétt reiknast í hlutfalli við rétt þeirra til atvinnuleysisbóta á árinu og fjölda mánaða sem viðkomandi hefur fengið greiddar atvinnuleysisbætur. Uppbótin verður þó aldrei lægri en sem nemur 20.979 krónum.

Uppbót vegna barns eða barna tekur engum skerðingum, heldur nemur í öllum tilvikum fjórum prósentum af óskertri desemberuppbót eða 3.356 krónum fyrir hvert barn.

Desemberuppbót atvinnuleitenda verður greidd út eigi síðar en 15. desember næstkomandi.