Fjölmennt á förðunarnámskeiði á Fosshótel

Á dögunum héldu þær Sara Dögg Johansen og Sigurlaug Dröfn Bjarnadóttir stærsta förðunarnámskeið sem haldið hefur verið hér á landi. „Masterclass“ fræðslan var einn dagur og voru þátttakendur í kringum 150 talsins. Sýndar voru tvær vinsælar farðanir og má sjá þær á myndunum hér fyrir neðan.

Sara og Sigurlaug, betur þekkt sem Silla, eru stofnendur og eigendur förðunarskólans Reykjavík Makeup School og eru báðar búnar að starfa við förðun í tæpan áratug. Þær hafa flutt nokkra þekkta förðunarfræðinga hingað til landsins vegna förðunarkennslu en þetta er fyrsta opna „masterclass“ námskeiðið sem þær halda og kenna á sjálfar.

Námskeiðið var haldið á Fosshótel í Reykjavík og var bæði opið þeim sem hafa áhuga á förðun og einnig förðunarfræðingum sem vildu bæta við sig þekkingu. Færri komust að en vildu og var salurinn fullur. Í albúminu hér að neðan má sjá myndir sem ljósmyndarinn Aldís Pálsdóttir tók á námskeiðinu.