Sigmundur segir brugðist við lofts­lags­vandanum með kol­röngum hætti

Formaður Miðflokksins segir lausnir vanta á loftslagsvandanum og verið sé að bregðast við honum með kolröngum hætti. Ef fer sem horfir stefnir í mestu manngerðu kreppu sögunnar.

Sigmundur Davíð Gunnlaugsson, formaður Miðflokksins, gerði upp árið í þættinum Sprengisandi á Bylgjunni í morgun ásamt Sólveigu Önnu Jónsdóttur, formanni Eflingar, og þingmanni Samfylkingarinnar Guðmundi Andra Thorssyni.

Talið barst snemma að loftslagsmálum sem allir voru sammála um að væri eitt af stærstu málum ársins. Sigmundur Davíð sagði lausnir vanta í þá umræðu og verið væri að bregðast við vandanum með kolröngum hætti.

„Þau markmið sem menn hafa talað fyrir eins og í þessum mótmælum, Extinction Rebellion og barnanna sem tala um að þurfi að hætta nettólosun kolefnis fyrir 2025. Ef að menn ætluðu að reyna þetta, sem er auðvitað óframkvæmanlegt, þá myndi það skapa mestu manngerðu kreppu sögunnar og bitna auðvitað lang mest á tekjulægra fólki,“ sagði Sigmundur Davíð. „Margar af þessum aðgerðum eru til þess gerðar að færa okkur aftur í tímann varðandi hluti eins og almenn lífsgæði og jafnræði. Fátækara fólk hefði ekki lengur efni á að ferðast til útlanda vegna þess að það er verið að refsa fólki fyrir það sem telst vera eðlileg hegðun og hluti af nútíma lífsgæðum.“

Sólveig Anna sagði kapítalískt kerfi við líði sem lifi á því að arðræðan verkafólk. Staðan væri sú að átta manns eigi jafn mikið og fátækasti hlutinn.

„Vandamál veraldarinnar er ekki það að það sé ekki til nóg handa öllum heldur það að örfáir fá að taka sér allt sem þeir þurfa og miklu meira til, algjörlega án þess að líta einu sinni á fólkið sem hýrist á botni allra okkar fjölmörgu stigvelda. Ef réttlætissjónarmiðið er sett ofar á listann um hvað skiptir okkur máli í mannlegum samskiptum held ég að það sé algjörlega augljóst að ekki aðeins munum við finna lausn heldur bara verðum við að gera það,“ sagði Sólveig Anna.

Guðmundur Andri sagði nauðsynlegt að hafa orkuskipti eins hratt og unnt er.

„Ég hef þá trú líka að í kapítalismanum búi ákveðið afl, búi ákveðnir möguleikar, sé honum stýrt. Sé markaðsöflunum stýrt og séu virk og öflug stjórnvöld með skýra stefnu sem beinir þessu afli í tiltekna átt þá sé hægt að gera ótrúlega hluti ótrúlega hratt. Ég er bjartsýnn á að ef það myndast enn þá ríkari skilningur á alþjóðavísu þá muni þjóðir heims geta snúið þessari þróun við og geta framkvæmt þessi orkuskipti frekar hratt.“