Úr Keflavík í Hauka

Haukar hafa styrkt sig í Dominos-deild kvenna en Irena Sól Jónsdóttir hefur skrifað undir samning við félagið. Hún kemur frá Keflavík.

Irena er bakvörður sem hefur spilað allan sinn feril hjá Keflavík en hún spilaði 24 leiki með Keflavík í vetur og var að meðaltali með rúmlega fjögur stig í leik.

„Ég er mjög spennt að koma til Hauka. Það verður ný og vonandi góð reynsla fyrir mig. Ég er spennt fyrir næsta tímabili og er tilbúin til þess að leggja mitt af mörkum og vonandi næ ég að hjálpa liðinu,“ sagði Irena við heimasíðu Hauka.

Bjarni Magnússon sem tók við Haukaliðinu á dögunum vonast til þess að Irena springi út í vetur eftir að hafa flogið úr hreiðrinu.

„Ég er mjög mjög ánægður að Irena hafa ákveðið að spila með okkur næsta vetur. Hún er góður leikmaður með góða reynslu úr Domino´s deildinni og á klárlega eftir að styrkja liðið. Irena hefur spilað með Keflavík allan sinn feril en vonandi mun þessi ákvörðun hennar að skipta um umhverfi hjálpa henni að taka næsta skref og bæta sig enn frekar sem leikmann og persónu,“ sagði Bjarni.

Á dögunum skrifaði einnig landsliðskonan Lovísa Björt Henningsdóttir undir samning við Hauka svo Haukarnir ætla að mæta með sterkt lið til leiks í vetur.