Svíar mega skipuleggja æfingaleiki

Sænska knattspyrnusambandið hefur ákveðið að hunsa tilmæli Íþróttasambands Svíþjóðar og leyfir nú æfingaleiki svo lengi sem ítrustu varúðar er gætt. Gaf knattspyrnusambandið út tilkynningu þess efnis fyrr í dag.

Er þetta þvert gegn öllum þeim tilmælum sem sænska Íþróttasambandið hefur gefið út. Það hefur óskað þess að allt íþróttastarf verði lagt niður á meðan Svíar, líkt og aðrar þjóðir, berjast við kórónuveiruna.

Svíar hafa sett á samkomubann þar sem ekki mega koma saman fleiri en 50 manns í einu. Það er ljóst að æfingaleikur milli tveggja fullmannaðra knattspyrnuliða myndi vera nálægt því að brjóta samkomubannið.

Keppni í efstu deildum Svíþjóðar átti að hefjast á nýjan leik nú í apríl en ljóst er að svo verður ekki. Óvíst er hvenær deilarkeppnin mun fara aftur á stað.

Í tilkynningu knattspyrnusambandsins segir að lokum að hlutirnir breytist hratt og ákvörðunin gæti því verið endurskoðuð fyrr heldur en seinna.