Virkum smitum fækkar á milli daga

Staðfest smit nýs afbrigðis kórónuveiru sem veldur Covid-19-sjúkdómnum eru nú alls 1701 hér á landi. Staðfestum smitum fjölgaði um tólf frá því að síðustu tölur birtust á covid.is klukkan eitt í gær.

Þá eru 37 nú á sjúkrahúsi og tíu á gjörgæslu vegna COVID-19. Alls hefur 889 manns batnað af veikinni, en 804 eru nú veikir og því í einangrun. Þá eru 2861 manns í sóttkví. 15751 hafa lokið sóttkví. Sýni sem hafa verið tekin eru orðin 35253 talsins. Átta dauðsföll hafa verið staðfest vegna kórónuveirusmits.

Klukkan tvö verður haldinn upplýsingafundur almannavarna og landlæknis þar sem farið verður yfir stöðu mála í sambandi við faraldurinn og farið yfir aðgerðir til að sporna við útbreiðslu kórónuveirunnar.

Víðir Reynisson yfirlögregluþjónn, og Alma D. Möller landlæknir verða á staðnum til að upplýsa landsmenn um þróun mála með tilliti til kórónuveirunnar hér á landi. Gestur fundarins verður Agnes M. Sigurðardóttir. Hún mun ræða verkefni Þjóðkirkjunnar á þessum tímum.