Barna­smit­sjúk­dóma­læknir: Börn virðast ekki smitast í móður­kviði

Valtýr Stefánsson Thors, barnasmitsjúkdómalæknir á Barnaspítala Hringsins, segir að svo virðist sem að börn smitist ekki af kórónuveirunni þegar þau eru í móðurkviði.

Valtýr var einn þeirra sem sat fyrir svörum á upplýsingafundi í samhæfingarstöð almannavarna klukkan 14. Var hann spurður um barnshafandi konur og veiruna.

Hann sagði að búið sé að kalla eftir gögnum varðandi þetta. Barnshafandi konur flokkist að mörgu leyti í áhættuhóp, til dæmis ef um inflúensu er að ræða.

Hann sagði að engin dæmi séu um að barnshafandi konur hafi orðið alvarlega veikar vegna veirunnar. Nokkur dæmi hafi verið um að barnshafandi konur í Kína hafi greinst veikar, fætt barn og hafi barnið reynst ósmitað. „Það virðist því sem að barnið smitist ekki í móðurkviði,“ sagði Valtýr.