Starfsfólki Google sagt að halda sig heima vegna faraldursins

Alphabet, móðurfélag tæknirisans Google, hefur skipað starfsfólki í Norður-Ameríku að vinna heiman frá sér til að draga úr hættu á útbreiðslu kórónuveirunnar. Um þúsund smit hafa þegar greinst í Bandaríkjunum og er búist við því að þeim fjölgi hratt á næstunni.

Áður höfðu starfsmenn Alphabet í Washington-ríki, þar sem útbreiðsla veirunnar hefur verið sem mest í Bandaríkjunum, verið beðnir um að halda sig heima. Nú eru hátt í hundrað þúsund starfsmenn í bæði Bandaríkjunum og Kanada beðnir um að vinna heima hjá sér, að sögn breska ríkisútvarpsins BBC.

Skrifstofur Alphabet í Norður-Ameríku verða enn opnar fyrir þá starfsmenn sem geta ekki sinnt störfum sínum heima.

Fleiri stórfyrirtæki hafa gripið til ráðstafana til að komast í veg fyrir kórónuveirusmit, þar á meðal Apple, Amazon, Microsoft, Facebook og Twitter. Google hefur einnig ákveðið að bregðast við faraldrinum með því að banna auglýsingar fyrir sóttvarnargrímur, stofna sérstakan sjóð svo hlutastarfsmenn og sölumenn geti tekið sér veikindaleyfi og farið í samstarf við breska heilbrigðisþjónustuna til að koma í veg fyrir útbreiðsla ósanninda um kórónuveirunar.