Leggur til 750 milljarða evra björgunar­pakka fyrir aðildar­ríki ESB

Framkvæmdastjórn Evrópusambandsins hefur lagt til að 750 milljarðar evra björgunarpakki verði samþykktur þannig að aðildarríki sambandsins geti brugðist við þeirri fordæmalausu krísu sem við blasir vegna heimsfaraldursins. Nemur það um 114 þúsund milljarða íslenskra króna á núvirði.

Samkvæmt tillögunum mun björgunarpakkinn samanstanda af styrkjum og lánum fyrir öll aðildarríki sambandsins.

Heimsfaraldur kórónuveirunnar hefur leikið aðildarríki Evrópusambandsins grátt, líkt og önnur ríki heims, og var skuldastaða margra suðrænna ríkja sambandsins erfið fyrir.

Í frétt BBC segir að sum aðildarríki – þar á meðal Austurríki, Holland, Danmörk og Svíþjóð – hafi lagst gegn því að auka skuldir sínar fyrir önnur aðildarríki og að stuðningurinn ætti þess í stað að vera í formi lána á lágum vöxtum, frekar en beinna styrkja.

Ljóst er að Ursula von der Leyen, forseti framkvæmdastjórnarinnar, muni þurfa að leita allra leiða til að fá sum aðildarríkin til að samþykkja hugmyndirnar.